عيوب البنت الكويتية

demis · 06-30-2009, 04:26 PM

وايد نسمع عن تزايد حالات الطلاق بين الكويتيين ، ووايد دراسات تلقي باللوم في فشل الزواج على البنت الكويتية حتى صار من الشائع إن احنا نسمع الشباب الكويتي يقول : إن البنت الكويتية مو مالت مسئوية بيت ، وما تشوف إلا نفسها وبس ، وإنها مهملة ، وإنها شايفة نفسها على الفاضي ، ومن هالحجي .
عموما يا ريت كل وحدة من رفيجاتي بالمنتدى تقول شنهي الأسباب الحقيقية لكثرة حالات الطلاق ؟
وهل فعلا البنت الكويتية هي السبب الرئيسي في حالات الطلاق ؟

amona3 · 06-30-2009, 04:33 PM

أنا اعتقد كل العيوب اللي في البنت تعتمد على الاهل وتربيتهم حق البنت فلازم تاخذ النصايح من الام قبل الزواج ولازم الاهل من الطرفين يحاولون يوافقون فيما بينهم ومايزيدون الطين بلة والام السنعة ما تطلع الا عيال سنعين وعسى الله يوفق الجميع ويقلل حالات الطلاق ويألف بين قلوب المتزوجين يااااااااارب

حاول تجي · 06-30-2009, 10:44 PM

لا حبيبتي مو شرط انا سعوديه صحيح ماكنت اتحمل مسؤليه بس تعلمت وحاولت الين اعتمدت على نفسي واااخرتها طلاااااق والسبه اهله

امراة · 07-01-2009, 05:38 PM

الاسباب عديدة ومو شرط دايم تكون من البنت الكويتية شكو !! مرات تصير من لقافة الاهل ومرات الريال يطلع مو ويه مسؤولية يحسب الزواج وناسة ولعب وفراش بس مايبي احد يحاسبه على شي
وانا بعرف ليش كل من يحاول يطلع عيوب فينا !!! هالسوالف بكل العالم مو متوقفة علينا بس
>>> اشتطيت لوول

الله أملي · 07-01-2009, 06:36 PM

لا حبيبتي الطلاق اعوذ بالله منتشر بكل العالم مالها شغل الكويتية وبعدين يعتمد على التربية الاهل هالزمن غير عن قبل عادي عندهم بنتهم تطلق والولد نفس الشي اهله يشجعونه على الطلاق يبون بنت الناس تمشي على مزاجهم واهم مو مربين ولدهم على المسؤولية طبعا مو الكل البعض

zowy · 07-01-2009, 08:54 PM

ليش دايما اتلومون البنات اغلب اسباب الطلاق الحين اهيه تدخل اهل الريال او بخله او شكه او غيره وغيره وغيره ليش تتناسون هالاسباب وتلومون البنت اذا ماقدرت تتحمل مو معناته انه في بنات تحملو واصبرو على عيوب ماراح تتغير بازواجهم انه اللي ماتتحمل موزينه بالعكس انا اشوف اللي من الاول اتشوف زواجها من انسان موزين لاي سبب كان مستحيل وتنهي عشان الله يرزقها بانسان احسن منه اهوه التصرف الصح انا ما ايد الطلاق لاسباب تافهه ومالوم الزوج دايما لانه هم في بنات يتدلعون ويستسهلون الطلاق بهالايام بس تكلمو عن اخطاء الشباب مو بس اتلومون البنت واتلومون تربيتها حرام عليكم

navigator-1 · 07-03-2009, 05:34 PM

فعلاً حالات الطلاق بالكويت شي فظيع وكل يوم تتزايد حالات الطلاق .. شكراً على طرح هالموضوع ... وياريت ان كل وحده تتكلم ومن غير اي تعصب للبنت خلونا نتكلم بكل صراحة عن السلبيات اللي موجوده في بعض البنات واللي هي تكون سبب في طلاقها اذا كان السبب هو البنت فأما اذا كان السبب هو الرجل فهذا موضوع اخر ويحتاج ان نتكلم عنه ... وارجو من ادارة المنتدى الأهتمام في هذا الموضوع وفي حالة الوصول لرؤية معينة او استبيان يساهم في تقليل حالات الطلاق فأرجو طرح هالموضوع بالصحف اليومية وان يكون موضوع له الأهمية من كبار المسئولين لمعالجة حالات الطلاق من خلال التوعية الصحيحة للجميع الزوج والزوجة والأهل وجزاج الله خير على هالفكرة